የአዲስ አበባውና የአሜሪካው ኢህአዴግ ቢሮ አይተዋወቁም

በሳምንቱ አጋማሽ የተሰማውን ዜና ያደመጡ፣ ከቅርብ ሆነው የሚከታተሉና ለጉዳዩ የቀረቡ እንደሚሉት የአዲስ አበባው ኢህአዴግና አሜሪካ ያለው የኢህአዴግ ቢሮ የማይተዋወቁበት ደረጃ ደርሰዋል። ኢህአዴግ በደብዳቤ የተረከባቸውን ስደተኞች በብሔር መትሮ “ኢትዮጵያዊ አይደላችሁም” በሚል ወደ አሜሪካ መመለሱ የእለት ጉርስና የዘመን መሻገሪያ ድርጎ የምትመድበውን አሜሪካንን አስቆጥቶ እንደነበርም ለማወቅ ተችሏል።

ኢህአዴግ እንደ “አሸባሪ” የፊጥኝ አስሮ ከፍሎሪዳ ጠቅላይ ግዛት ማያሚ እስር ቤት ወደ ኢትዮጵያ የወሰዳቸው ወገኖች ከአገራቸው የወጡበትን ጊዜ ሳይቆጥር አሜሪካ ለመድረስ ብቻ እስከ አስራ አራት ወራት ፈጅቶባቸዋል። ስደተኞቹ በብራዚል፣ በኮሎምቢያ ጫካ ፣ በፓናማ ወንዝ አሳብረው፣ በሜክሲኮና በድምሩ 16 የሚደርሱ አገራትን አልፈው ነበር አሜሪካ ጥገኝነት የጠየቁት። እነዚህ ወገኖች ህጉ ከሚፈቅደው ውጪ ከስድስት ወር በላይ በፍሎሪዳ ጠቅላይ ግዛት ማያሚ እስር ቤት መቆየታቸውን ጎልጉል መዘገቡ ይታወቃል። በአስራ አንደኛው ሰዓት ለአቶ ኦባንግ ሜቶ የላኩት “የድረሱልን” ደብዳቤ ነገሩን ሁሉ ይፋ አደረገው።

በዚህ መካከል ነበር አቶ ግርማ ብሩ የሚመሩት የህወሃት የአሜሪካ ቢሮ ስደተኞቹን “ዜጎቼ ናቸው” ብሎ ጠርቶ ሲያበቃ፣ ስም ዘርዝሮ፣ ቢመለሱ ምንም አይሆኑም፣ ምንም አይደርስባቸውም፣ ሰላማዊ ኑሮ መኖር ይችላሉ፣ ወዘተ በማለት ደብዳቤና አዘጋጅቶ በሰጠው የመጓጓዣ ሰነድ አማካይነት ወጣቶቹ ተላልፈው ተሰጥተውታል።

ጎልጉል ከተመላሾች ባገኘው መረጃ መሰረት፣ የአሜሪካ ልዩ የፖሊስ አባላት ማያሚ እስር ቤት ሌሊት መጡ፤ ተነሱ አሏቸው፤ እጃቸውን አሰሩ፤ በመኪና ተጫኑ። አቅራቢያ ባለ አየር ማረፊያ በተዘጋጀ አነስተኛ የግል አውሮፕላን ተጫኑ። ከአስራ አንድ ሰዓት በላይ በረራ ካደረጉ በኋላ ሴኔጋል ዳካር አረፉ። አውሮፕላንዋ ነዳጅ ስትሞላ እነሱም ውሃና የሚቀመስ አግኝተው ባሉበት ቆዩ። ከዚያም ወደ “አገራቸው” ኢትዮጵያ አቀኑ። አዲስ አበባ ሲደርሱ የህወሃት ነፍጥ አንጋቾች ተረከቧቸው። ጉዞው በህወሃት አሸናፊነት ተጠናቀቀ። ለጉዞው አሜሪካኖቹ ከፍተኛ ወጪ አውጥተዋል።

ርክክቡ ከተጠናቀቀ በኋላ ሁሉም በየተራ ቃለመጠይቅ ተደረገላቸው። መከረኛው የብሔር ጥያቄ ቀረበ። ጠያቂዎቹ የህወሃት ሰዎች የብሄር ጥያቄውን ተከትሎ ወጣቶቹን እንደ እህል በዘር መደቧቸው። እናትና አባታቸው የኢትዮጵያ ሶማሌና አማራ፣ ሃረሪና ኦሮሞ የሆኑት ሁለቱ፣ እንዲሁም ሁለት የጅጅጋ ነዋሪዎችና የኢትዮጵያ ሶማሌ ተወላጆች እና ሙሉ በሙሉ የሃረሪ ተወላጅ እንደሆነ የተናገረውን ጨምሮ አምስቱ ተመርጠው “አማርኛ በደንብ ትችላላችሁ ግን ኢትዮጵያዊ አይደላችሁም” ተብለው ወደ አሜሪካ እንደተመለሱ ለማወቅ ተችሏል፡፡

በጉዳዩ ላይ የአዲስ አበባው አሜሪካ ኤምባሲ ከከፍተኛ የህወሃት መሪዎች ጋር ዘለግ ያለ ንትርክ አካሂደዋል። ራሱ “ዜጎቼ” ብሎ ደብዳቤ በመጻፍ ተላልፈው እንዲሰጡት ጠይቆ ሲያበቃ፣ ራሱ የጉዞ ሰነድ አዘጋጅቶ፣ ራሱ እስር ቤት ድረስ ሄዶ እጅና እግር አስሮ፣ ራሱ ነፍጥ አንጋች አሰልፎ አቀባበል አድርጎ፣ ከአንድ የትግራይ ልጅ በስተቀር ሁሉንም በአማርኛ አነጋግሮ በስተመጨረሻ አምስቱን “ኢትዮጵያውያን አይደላችሁም” ብሎ ወደ አሜሪካ እንዲመለሱ ማድረጉ “አውራ ፓርቲ” የሚባለውን ኢህአዴግን ቅሌት ውስጥ እንደጣለው ጉዳዩን ሲከታተሉ የነበሩ አመልክተዋል።

“አሜሪካ ያለው ኢህአዴግና አዲስ አበባ ያለው ኢህአዴግ የማይተዋውቁበት ደርጃ ደርሰዋል” ሲሉ አቶ ኦባንግ ሜቶ ለጎልጉል የአሜሪካ ዘጋቢ ገልጸዋል። አክለውም “ይህ የሚያሳየው ድርጅቱ በተግባር መዋቀሩ የተሽመደመደ፣ ማዕከላዊነት የሚባል ነገር መጥፋቱን፣ ሁሉም በየፊናው ሩጫ መጀመሩን፣ እንደ አገር የክስረት ማመላከቻ ነው” ሲሉ በተፈጸመው ጉዳይ ላይ አስተያየታቸውን ሰጥተዋል።

ከተመለሱት መካከል ያነጋገሯቸው እንዳሉ ያስታወቁት ኦባንግ፤ ካሁን በኋላ ልጆቹ እስር ቤት የሚቆዩበት አንዳችም ምክንያት ባለመኖሩ እንደሚፈቱ ጠቁመዋል።

“ኑሮዬ ሳይስተካከል የት እንዳለሁ እንኳን ለቤተሰቦቼ አልገለጽኩም። እናትና አባቴ ልሙት፣ ልኑር አያውቁም፤ ከተለየኋቸው ጊዜ ጀምሮ ስልክ ሳልደውል አራት አመት ከአስራ አንድ ወራት አልፈውኛል” በሚል የድረሱልኝ ጥያቄ ጨምሮ ዘጠኙን ወገኖች ለማስፈታት አቶ ኦባንግ ባለቀ ሰዓት መረጃው ደርሷቸው የሚቻላቸውን ሁሉ ጥረው ነበር። “የድረሱልን ጥሪውን እንደተቀበልኩ ወዲያውኑ ስደተኞቹን የሚወክል ጠበቃ ያዝኩ። የወጣቶቹ ከስድስት ወር በላይ መታሰር ከህግ አንጻር አግባብ ባለመሆኑና ስደተኞቹ ሊመለሱ እንደማይገባ ለማውቃቸው እንደራሴዎችና ሴናተሮች በማስረዳት የእስር ውሳኔ ላስተላለፉት ዳኛ ደብዳቤ ሊላክ የሰዓታት ዕድሜ ሲቀር ነበር የመላካቸውን ጉዳይ የሰማሁት” በሚል ነበር ሃዘናቸውን የገለጹት።

ቀደም ሲል በአስራ አንደኛው ሰዓት ጉዳዩን የያዘው ጠበቃ የልጆቹን መመለስ ሲሰማ መገረሙን፤ ሌሎችም አካላት በተመሳሳይ በሰሙት ሁኔታ በኢትዮጵያ በመንግሥት ደረጃ ያለው ሥርዓት አልበኝነት ያስደነገጣቸው መሆኑን ያመለከቱት ኦባንግ፣ ጉዳዩ ህጉ በሚያዝው መሰረት እንደሚከናወን አመልክተዋል። በርግጠኛነት ልጆቹ በቅርቡ እንደሚፈቱም አክለዋል። በሌላ መልኩ በተለያዩ የአሜሪካ ግዛቶች በሚገኙ እስር ቤቶች ተመሳሳይ የድረሱልኝ ጥሪ ያሰሙ ወገኖች መኖራቸውንና እነዚህን ወገኖች ለመርዳት በሳቸው በኩል የሚደረገውን ሁሉ እያደረጉ መሆናቸውን ተናግረዋል።

በሊቢያ ዜጎች ስልክ ሲደውሉ ጆሮዋቸው ላይ በመዝጋት፣ ስልክ እንዳይደውሉ በመከልከል፣ በተለያዩ አረብ አገራት እህቶቻችን ላይ ሰቃይ ሲደርስና ሲገደሉ፣ በደቡብ አፍሪቃ በዜጎች ላይ ተመሳሳይ አደጋ ሲደርስ ህወሃት ያሳየውን ቸልተኛነት ያስታወሱት ኦባንግ “ብሔርን፣ ዘርን፣ ወገንን፣ … ለይቶ የሚፈጸሙ ጥፋቶች ፈር እየለቀቁ የማንመልሰው ደረጃ ከመድረሳቸው በፊት ለናርቃቸው ይገባል” ሲሉ ስጋታቸውን ገልጸዋል። ዜጎች ከዘር ይልቅ ለሰብዓዊነት ቅድሚያ በመስጠት እርስ በርስ መደጋገፍ ላይ እንዲያተኩሩም አሳስበዋል።

ማሳሰቢያ፤ በተለይ በስም ወይም በድርጅት ስም እስካልተጠቀሰ ድረስ በጎልጉል የድረገጽ ጋዜጣ^® ላይ የሚወጡት ጽሁፎች በሙሉ የጎልጉል የድረገጽ ጋዜጣ^®ንብረት ናቸው፡፡ ይህንን ጽሁፍ ለመጠቀም የሚፈልጉ ሁሉ የዚህን ጽሁፍ አስፈንጣሪ (link) ወይም የድረገጻችንን አድራሻ (http://www.goolgule.com/) አብረው መለጠፍ ከጋዜጠኛነት የሚጠበቅና ህጋዊ አሠራር መሆኑን ልናሳስብ እንወዳለን፡፡

Print, PDF or Email

<!–

–>