ምን ዓይነት ሙዚቃ ነው አንተ?
- ወደዱት ክቡር ሚኒስትር?
- ያልተጠየከውን ምን ያስቀባጥርሃል? አማርኛ ዘፈን ነው ለመሆኑ?
- አዎ ክቡር ሚኒስትር ራፕ ነው፡፡
- ምንድነው ራፕ?
- ዘመናዊ ሙዚቃ ነው፡፡
- ይሰማሃል የሚለው ግን?
- በሚገባ ክቡር ሚኒስትር፣ እርስዎ አይሰማዎትም?
- ኧረ ምንም አይሰማኝም፡፡
- ስለለመደብዎት ይሆናላ፡፡
- ምኑ ነው የለመደብኝ?
- አለማዳመጡ!
[የክቡር ሚኒስትሩ አማካሪ ቢሯቸው ገቡ]
- ፕሮፖዛሉ አልቋል ክቡር ሚኒስትር፡፡
- የትኛው ፕሮፖዛል?
- የትልቁ ፕሮጀክት ፕሮፖዛል፡፡
- ስለዚህ ቀጣዩ ሥራ ምንድን ነው?
- ያው ፕሮጀክቱን ማን ይገንባው የሚለው መወሰን አለበት፡፡
- እሱማ ተወስኗል፡፡
- ጨረታ እንዲወጣ ማለትዎ ነው?
- የምን ጨረታ ነው የምትለው?
- ማለቴ ይህንን ትልቅ ፕሮጀክት ሊገነባ የሚችል ተቋም ለማግኘት ነዋ፡፡
- እኮ ምን ዓይነት ጨረታ?
- ዓለም አቀፍ ጨረታ ነዋ፡፡
- የኒዮሊብራሊስቶች ድርጅት መጥቶ ሊገነባ?
- የአገር ውስጥ ጨረታም ማውጣት እንችላለን፡፡
- እኮ የማንም ኪራይ ሰብሳቢ ድርጅት መጥቶ እንዲገነባው?
- ታዲያ ማን ይገንባው ክቡር ሚኒስትር?
- እኛው ያቋቋምነው ድርጅት ነዋ፡፡
- ያለምንም ጨረታ?
- ፕሮጀክቱ እኮ የመንግሥት ነው፡፡
- ቢሆንስ ክቡር ሚኒስትር?
- የመንግሥት ፕሮጀክት በመንግሥት ተቋም ነው መገንባት ያለበት፡፡
- ከመቼ ጀምሮ?
- አንተ ለመሆኑ ማን ነው ተቆጣጣሪ ያደረገህ?
- እንዳያስጠይቀን ብዬ ነው፡፡
- ስለእሱ አታስብ፡፡
- እንዴት ክቡር ሚኒስትር?
- ጠያቂውም መንግሥት ነው፤ መላሹም መንግሥት ነው፡፡
- ሕዝቡስ?
- ለሕዝቡማ ከባድ የቤት ሥራ ሰጥተነዋል፡፡
- ምን ዓይነት የቤት ሥራ?
- የኑሮ ውድነት የሚሉት፡፡
- ግን ክቡር ሚኒስትር…
- የምን ግን?
- አሁን ይኼ ተቋም ይህን ትልቅ ፕሮጀክት ለመገንባት ከዚህ በፊት ምን ሠርቷል?
- ምን ዓይነት ጥያቄ ነው?
- ማለቴ ልምድ አለው ወይ?
- እንዲህ ዓይነት ሥራ እየሠራ ልምድ ካልያዘ፣ እንዴት ልምድ ሊኖረው ይችላል?
- ያው ይኼ ከባድ ሥራ ነው ብዬ ነው፡፡
- ተቋሙ ከባድ የሚባል ነገር አያውቅም፤ ብረት ነው ስልህ፡፡
- እንደ ተረቱ እንዳይሆን ብዬ ነው፡፡
- ምንድን ነው ተረቱ?
- መልከ ጥፉን በስም ይደግፉ፡፡
- እና እነሱ እንደስማቸው ብረት አይደሉም እያልከኝ ነው?
- ሥጋት ስላለኝ ነው ክቡር ሚኒስትር፡፡
- ምኑ ነው የሚያሠጋህ?
- አቅማቸው!
[ከክቡር ሚኒስትሩ ጋ የቦርድ አባል የሆኑ ሌላ ሚኒስትር ደወሉላቸው]
- ክቡር ሚኒስትር ምነው ከቦርድ ስብሰባው ቀሩ?
- በጣም አፋጣኝ ሥራ ገጥሞኝ ነው፡፡
- ያው አዲሱ ትልቅ ፕሮጀክት ወደ ሥራ እንዲገባ ተወስኗል፡፡
- ማን ይሥራው ተባለ?
- እሱ ገና አልተወሰነም፣ ግን በጣም አሳሳቢ ጉዳይ ነው፡፡
- ምኑ ነው የሚያሳስበው?
- ያው ፕሮጀክቱ ትልቅ ስለሆነ ማን ይገንባው የሚለው ነዋ፡፡
- ምን ችግር አለው? የእኛው ድርጅት ይገነባዋላ፡፡
- የትኛው ድርጅት?
- ትልቁ ድርጅት ነዋ፡፡
- እሱማ ሕፃን ነው እኮ፡፡
- እኮ ሕፃን ልጅ እንዲያድግ ሥጋውንም፣ ወተቱንም፣ ፋፋውንም መመገብ አለብህ፡፡
- እሱማ ልክ ነው፡፡
- ስለዚህ ይኼ ድርጅት እንዲያድግ ባቡሩንም፣ ግድቡንም፣ ፋብሪካውንም መመገብ አለብን፡፡
- ክቡር ሚኒስትር በቃ አከበርኩዎት፡፡
- ለዛ እኮ ነው ክቡር ሚኒስትር የሚሉኝ፡፡
- እኔማ ለእርስዎ አንድ ቃል ነው ያለኝ፡፡
- ምን የሚል ቃል?
- ብልህ!
[ክቡር ሚኒስትሩ ፕሮጀክቶቹን የሚገነባው ድርጅት ኃላፊ ጋ ደወሉ]
- እንዴት ነዎት ክቡር ሚኒስትር?
- ጠፋህ እኮ ወዳጄ፡፡
- ያው በርካታ ፕሮጀክቶች እኮ ተቀብለን ደፋ ቀና እያልን ነው፡፡
- ሥራ በዛባችሁ አይደል?
- ይኸው አገሪቷን እኮ በጫንቃችን ላይ ተሸክመናት ነው የምንዞረው፡፡
- ይገባኛል እኛም ጫንቃችሁ እንዲጠነክር እኮ ነው በላይ በላይ የምናጐርሳችሁ፡፡
- ሌላ የሚጐረስ ተገኘ እንዴ?
- የሚጐረስማ በየጊዜው ነው ያለው፡፡
- ዛሬ ምን ይዘው መጡ ታዲያ?
- ትልቅ ፕሮጀክት እንዲሰጣችሁ አስደርጌያለሁ፡፡
- ውለታዎትን በምን እንመልስ ታዲያ?
- ያው ጀርባዬን ማከክማ እንዳትረሱ፡፡
- ክቡር ሚኒስትር እዚህ የደረስነው እየታከክን አይደል እንዴ?
- ለዛ ነው እኔም ጀርባዬን ማከክ አትርሱ ያልኩት፡፡
- ክቡር ሚኒስትር አሁንማ ጀርባዎትን በእጄ አይደለም የማክልዎት፡፡
- ታዲያ በምን ልታከው ነው?
- በኤክስካቫተር!
- እንዲህ ከሆነማ ሌላም ፕሮጀክት በቅርቡ አጐርሳችኋለሁ፡፡
- ክቡር ሚኒስትር ጉርሻው ላይ ግን ጥንቃቄ መውሰድ አለብን፡፡
- ምን ዓይነት ጥንቃቄ?
- ብዙ አጉርሳችሁን በኋላ…
- በኋላ ምን?
- እንዳታስተፉን!
[የክቡር ሚኒስትሩ ጸሐፊ ቢሯቸው ገባች]
- ሰሙ ክቡር ሚኒስትር?
- ምኑን?
- የክበባችን ወጥ ጨላፊ እኮ ሆስፒታል ገባች፡፡
- ምን ሆና? አደጋ ደረሰባት እንዴ?
- የለም የለም፣ እርጉዝ ስለሆነች ልትወልድ ነው፡፡
- ውይ በጣም ደስ የሚል ዜና ነው የነገርሽኝ፡፡
- ምን እናድርግላት ታዲያ?
- በአስቸኳይ አማካሪዬን ጥሪልኝ፡፡
- ለምን ክቡር ሚኒስትር?
- ግብረ ኃይል መቋቋም አለበት፡፡
- የምን ግብረ ኃይል?
- ወጥ ጨላፊያችንን የሚያዋልድ ግብረ ኃይል!
[የክቡር ሚኒስትሩ አማካሪ ተጠርቶ ቢሯቸው ገባ]
- ፈለጉኝ ክቡር ሚኒስትር?
- ስለፕሮጀክቱ እንድናወራ ብዬ ነው፡፡
- ስለቅድሙ ፕሮጀክት ነው?
- አይደለም፣ አዲስ ፕሮጀክት መጥቶልናል፡፡
- የምን አዲስ ፕሮጀክት?
- ወጥ ጨላፊያችን ልትወልድ ሆስፒታል ገብታለች፡፡
- እሺ፡፡
- ስለዚህ እሷን የሚያዋልድ ግብረ ኃይል መቋቋም አለበት፡፡
- እየቀለዱ ነው ክቡር ሚኒስትር?
- የምን ቀልድ ነው? ስማ የእሷን ጉዳይ የሚከታተል ኮሚቴ መቋቋም አለበት፡፡
- አወላለዷን የሚከታተል ኮሚቴ እያሉኝ ነው?
- እህሳ፣ አንደኛው የመልካም አስተዳደር ችግር እኮ ይህ ነው፡፡
- ምን እያሉ ነው ክቡር ሚኒስትር?
- ይኸው ኮሚቴ እንዴት ይቋቋማል እያልከኝ ነዋ?
- ገርሞኝ ነዋ ክቡር ሚኒስትር፡፡
- ስማ አንድም እናት በወሊድ መሞት የለባትም እያልን አሁን ለምን ኮሚቴ ይቋቋማል ትላለህ?
- እሺ ምን ዓይነት ኮሚቴ ነው የሚቋቋመው?
- ሦስት ኮሚቴ መቋቋም አለበት፡፡
- ይንገሩኝ እስቲ፡፡
- አንደኛ የገንፎ አስገንፊ ኮሚቴ፡፡
- እ…
- ሁለተኛ የአጥሚት ዝግጅት ኮሚቴ፡፡
- እ…
- ሦስተኛ የዳይፐርና ዋይፐር አፈላላጊና ገዢ ኮሚቴ፡፡
[የገንፎ አስገንፊ ኮሚቴው ኃላፊ ክቡር ሚኒስትር ቢሮ ገባ]
- ለመሆኑ ይኼን ኮሚቴ ለመምራት ምን ብቃት አለህ?
- ክቡር ሚኒስትር ቁርስ፣ ምሳ፣ እራቴን ከገንፎ ውጪ አልበላም፡፡
- ለነገሩ ፊትህ ራሱ እንደገንፎ የተነፋ ነው፡፡
- ክቡር ሚኒስትር የተሰጠኝን ኃላፊነት ለመወጣት ከተማ ውስጥ አሉ የተባሉ የገንፎ እህሎችን ከነዋጋቸው አጣርቻለሁ፡፡
- በጣም ደስ ይላል፡፡
- እና በኤክስፖርት ስታንዳርድ ያለ የገንፎ እህል አግኝቻለሁ፡፡
- ስማ ሥራህን እንዲህ በትጋት የምትሠራ ከሆነ ይኼን ኮሚቴ አሳድገዋለሁ፡፡
- ወደ ምንድን ነው የምታሳድጉት ክቡር ሚኒስትር?
- ወደ ገንፎ አስገንፊ ኮርፖሬሽን!
[የአጥሚት ዝግጅት ኮሚቴ ኃላፊዋ ክቡር ሚኒስትሩ ቢሮ ገባች]
- በአማካሪዬ በጣም ተደስቻለሁ፡፡
- እንዴት ክቡር ሚኒስትር?
- የፆታን ተዋፅኦ ከግምት ውስጥ ያስገባ ኮሚቴ ነው ያቋቋመው፡፡
- ያው ክቡር ሚኒስትር እኔ በዘርፉ ከፍተኛ ልምድ ነው ያለኝ፡፡
- ትንሽ ብታብራሪልኝ?
- በአፌ ጁስ የሚባል ቀምሼ አላውቅም፡፡
- ምንድን ነው የምትጠጪው ታዲያ?
- አጥሚት ነዋ ክቡር ሚኒስትር፡፡
- እና ምን ይዘሽ መጥተሻል?
- ያው ለሚኒስቴር መሥሪያ ቤቱ ሁሉ የሚበቃ የአጥሚት እህል ተዘጋጅቷል፡፡
- በዚህ ትጋትሽ ከቀጠልሽ ኮሚቴውን አሳድገዋለሁ፡፡
- ወደ ምንድን ነው የሚያሳድጉት?
- ወደ አጥሚት ዝግጅት ዳይሬክቶሬት!
[የዳይፐርና ዋይፐር አፈላላጊና ገዢ ኮሚቴ ኃላፊው ክቡር ሚኒስትሩ ቢሮ ገባ]
- ይህን ኮሚቴ ለመምራት ምን ብቃት አለህ?
- ክቡር ሚኒስትር አያስታውሱም እንዴ ግምገማ ላይ ምን ያህል ጊዜ ሽንት ቤት እንደምመላለስ?
- ሽንታም ነኝ እያልከኝ ነው?
- ከሙስናዬ ብዛት በግምገማ ወቅት በሽንት ብቻ መገላገሌ ዕድለኛ ነኝ፡፡
- ስለዚህ ምን አስበሃል?
- ዳይፐርና ዋይፐር ከውጭ ለማምጣት የውጭ ምንዛሪ ስለሚጠይቀን ሌላ ሐሳብ አለኝ፡፡
- ምንድን ነው ሐሳብህ?
- ያ ትልቁ ድርጅት ለምን ዳይፐርና ዋይፐር እዚሁ አገር ውስጥ አያመርትም?
- የሚገርም ሐሳብ ነው ያመጣኸው እባክህ?
- እዚህ ብናመርተው የውጭ ምንዛሪ ማትረፍ እንችላለን ብዬ ነው፡፡
- አሁኑኑ ወደ ምርት መገባት አለበት፡፡
- ሐሳቤን ስለተቀበሉኝ አመሰግናለሁ ክቡር ሚኒስትር፡፡
- ከዛሬ ጀምሮ አንተም የእኔ ልዩ አማካሪ ሆነሃል፡፡
- በምን ጉዳይ ክቡር ሚኒስትር?
- በዳይፐርና ዋይፐር!
ምንጭ – ሪፖርተር