ክቡር ሚኒስትር – በጋዜጣው ሪፖርተር

[የክቡር ሚኒስትሩ ፊት ጠቋቁሮ አማካሪያቸው አገኛቸው]
–    ምነው ክቡር ሚኒስትር?
–    ምነው?
–    ፊትዎት ጠቋቁሯል፡፡
–    ትዝ ብሎኝ ነዋ፡፡
–    ምኑ ክቡር ሚኒስትር?
–    ዊኬንድ ኳስ አላየህም እንዴ?
–    የማንን ክቡር ሚኒስትር?
–    የእነባርሳን ነዋ፡፡
–    በጣም ነው ደስ ያለኝ፡፡
–    እኔማ ስቃጠል ነበር ሰሞኑን፡፡
–    ለምን ክቡር ሚኒስትር?
–    ባርሳ እኮ አሸናፊ ቡድን ነው፡፡
–    እኔ ግን በጣም ነው ደስ ያለኝ፡፡
–    ለምንድን ነው ደስ ያለህ?
–    ሁሌ አንድ ዓይነት ቡድን ሲያሸንፍ ያስጠላላ፡፡
–    ከቻለ ምን ታደርገዋለህ?
–    አይ ግን ያው ሁሌ ፉክክር ሲኖር ጥሩ ነው፡፡
–    የፉክክር ቤት ሳይዘጋ ያድራል ሲባል አልሰማህም?
–    ግን ክቡር ሚኒስትር ኳስ ላይ ፉክክር ከሌለ ያስጠላል፡፡
–    እኔ ግን ፉክክር ያለበት ነገር ደስ አይለኝም፡፡
–    ግን አንድ ነገር ልንገርዎት፡፡
–    ምን?
–    እስቲ የአገራችንን ፖለቲካ ይመልከቱት፡፡
–    ምን ሆነ?
–    ፉክክር የለበትም፡፡
–    በጣም ደስ ይላላ፡፡
–    ምን ደስ ይላል ያሰለቻል እንጂ?
–    ምኑ ነው የሚያሰለቸው?
–    ሁሌ አንድ ዓይነት ቡድን የበላይነቱን ሲወስድ፡፡
–    እኛ እንግዲህ ተፎካካሪ አናመጣ፡፡
–    ፅድቁ ቀርቶ በቅጡ በኮነነኝ አሉ፡፡
–    እንዴት ማለት?
–    ተፎካካሪ ማስመጣቱ ቀርቶባችሁ ያሉትን ባታንኮታኩቷቸው ጥሩ ነበር፡፡
–    ጥሩ ተፎካካሪ መቼ አለ?
–    እናንተ እንዲኖር መቼ ትፈልጋላችሁ?
–    አንተ ግን ከፀረ ልማት ኃይሎች ጋር መዋል ጀመርክ እንዴ?
–    ምነው ክቡር ሚኒስትር?
–    ተፎካካሪ ምናምን አበዛህ፡፡
–    ያው ሁሌም አንድ ቡድን የበላይ ሲሆን ይሰለቻል ብዬ ነው፡፡
–    እና ኢሕአዴግ ተሰልችቷል እያልከኝ ነው?
–    እሱን እርስዎ አሉ፡፡
–    እኔን ግን ያሳሰበኝ ምኑ እንደሆነ ታውቃለህ?
–    ምንድን ነው ያሳሰብዎት?
–    ባርሳ በመሸነፉ ብዙ ሰዎች እጅግ ደስተኞች ናቸው፡፡
–    እንዳልኩዎት ሁሌም አንድ ቡድን ብቻ ሲያሸንፍ ይሰለቻል፡፡
–    እንደዚህ ከሆነ የእኛን ሽንፈት በጉጉት የሚጠባበቁ ሞልተዋል ማለት ነው፡፡
–    የማንን ሽንፈት?
–    የኢሕአዴግን፡፡
[ክቡር ሚኒስትሩ ከመሥሪያ ቤታቸው ከፍተኛ የሥራ ኃላፊዎች ጋር ስብሰባ ተቀምጠዋል]
–    ዛሬ ለምን እንደተሰበሰብን ታውቃላችሁ?
–    አናውቅም፡፡
–    በመሥሪያ ቤታችን ከፍተኛ የመልካም አስተዳደር ችግር አለ፡፡
–    እውነት ነው ክቡር ሚኒስትር፡፡
–    ለዚህ ችግር አፋጣኝ መፍትሔ ማምጣት አለብን፡፡
–    ደስ ይለናል ክቡር ሚኒስትር፡፡
–    ከሰው ኃይል አስተዳደር እንጀምራለን፡፡
–    እሺ ክቡር ሚኒስትር፡፡
–    ሰዎች የሚቀጠሩት በወንዝ ብቻ ነው፡፡
–    እ…
–    መሥሪያ ቤታችንን በአብዛኛው የሞሉት የአንድ ብሔር ሰዎች ናቸው፡፡
–    ምን ላድርግ ክቡር ሚኒስትር?
–    በአገራችን ብዙኃነትን እናሰፍናለን እያልን ይህ መደረጉ ከፍተኛ ስህተት ነው፡፡
–    አውቃለሁ ክቡር ሚኒስትር፡፡
–    ይህ ችግርህ ደግሞ በተደጋጋሚ ተነግሮሃል፡፡
–    ወድጄ አይደለም ክቡር ሚኒስትር፡፡
–    እንዴት ማለት?
–    የወንዝ ነገር በአንዴ አይለቅም፡፡
–    የወንዝ ነገር እንዲለቅህ ወንዝ ይዞህ ሊሄድ ይገባል ማለት ነው?
–    እንደዛ ማለቴ አይደለም፡፡
–    ለማንኛውም ዕርምጃ ይወሰድብሃል፡፡
–    ኧረ ይቅርታ ክቡር ሚኒስትር፡፡
–    በቃ!
[ክቡር ሚኒስትሩ የIT ክፍል ኃላፊውን መገምገም ጀመሩ]
–    የአንተ ችግር ምን እንደሆነ ታውቃለህ?
–    ምንድን ነው ክቡር ሚኒስትር?
–    ኔትወርካችን እንደማይሠራ ታውቃለህ፡፡
–    ክቡር ሚኒስትር ኔትወርኩ መቆራረጥ አለበት ስላሉኝ እኮ ነው፡፡
–    እኔ ያልኩህ የሙስና ኔትወርኩን ነው፡፡
–    እ…
–    በዛ ላይ መሥሪያ ቤታችን ያሉት ኮምፒዩተሮች አንድ ዓይነት ብቻ ናቸው፡፡
–    ዴል ኮምፒዩተር ይገዛ ስላሉኝ ነው፡፡
–    ከዴል ውጪ ግን ቶሺባ ወይም HP ለምን አይገዛም?
–    እሱ ጥሩ ነው ብዬ ነው፡፡
–    የለም፣ ችግርህ በብዝኃነት ስለማታምን ነው፡፡
–    እንዴት ማለት?
–    ከዴል ውጪ ቶሺባ ወይም HP መጠቀም አትፈልግማ፡፡
–    ይኼ ከብዝኃነት ጋር ምን ያገናኘዋል?
–    በደንብ ይገናኛል፡፡
–    እ…
–    በዛ ላይ ዴል ለምን እንደምትገዛ አውቃለሁ፡፡
–    ለምንድን ነው?
–    ደልደል ያለ ገንዘብ ስለምታገኝ ነዋ፡፡
–    ምን አሉኝ?
–    ለማንኛውም ዕርምጃ ይወሰድብሃል፡፡
–    ኧረ ይቅርታ ክቡር ሚኒስትር፡፡
–    ይቅርታ መፍትሔ አይደለም፡፡
–    ምንድን ነው መፍትሔው?
–    ቅጣት!
[ክቡር ሚኒስትሩ የፋይናንስ ኃላፊውን መገምገም ጀመሩ]
–    አጅሬው፡፡
–    አቤት ክቡር ሚኒስትር፡፡
–    ዕቃ መቼ ነው በጨረታ የሚገዛው?
–    ራስዎት ጨረታ ይቅር ስላሉኝ እኮ ነው፡፡
–    ከእኔ ውጪ ያለጨረታ የምትገዛው ዕቃ ስንት ነው?
–    እ…
–    እና አንተ ሚኒስትር ነህ?
–    ኧረ በምን ዕድሌ?
–    ሳትሆን ማን ነው ያለጨረታ ዕቃ እንድትገዛ የፈቀደልህ?
–    ስህተት ነው ክቡር ሚኒስትር፡፡
–    ስለዚህ አንተም ዕርምጃ ይወሰድብሃል፡፡
–    ኧረ ይቅርታ ክቡር ሚኒስትር፡፡
–    የይቅርታ ጊዜ አልፏል፡፡
–    እና ምን ሊያደርጉ?
–    አንተ ቦታ ትቀየራለህ፡፡
–    ወዴት ክቡር ሚኒስትር?
–    የIT ክፍል ኃላፊ ትሆናለህ፡፡
–    ኧረ እኔ ሙያውን አላውቀውም፡፡
–    ሒሳብ በፒችትሪ አይደለ እንዴ የምትሠራው?
–    አዎን ክቡር ሚኒስትር፡፡
–    ስለዚህ የIT ክፍልን ለመምራት ቅርቡ አንተ ነህ፡፡
–    ምንም ሳላውቅ ክፍሉን ልመራ?
–    ስላላባረርኩህ ነው እንዴ እንደዚህ የምትጨቃጨቀው?
–    እሱስ እውነትዎትን ነው፡፡ ከባድ ቅጣት ነው፡፡
–    የIT ክፍል ኃላፊው ደግሞ የሰው ኃይል አስተዳደር ኃላፊ ሆነሃል፡፡
–    እንዴ ክቡር ሚኒስትር?
–    ኮምፒዩተር በአግባቡ ማስተዳደር ስላልቻልክ ሰዎችን ማስተዳደር ትጀምራለህ፡፡
–    ይሻላል ክቡር ሚኒስትር?
–    ከመባረር አይሻልም?
–    ለነገሩ ልክ ብለዋል፡፡
–    የሰው ኃይል አስተዳደር ኃላፊው ደግሞ የፋይናንስ ክፍል ኃላፊ ሆነህ ትሠራለህ፡፡
–    ክቡር ሚኒስትር ምንም እኮ አላውቅም፡፡
–    ስለገንዘብ የማያውቅ ማን አለ?
–    እ…
–    የወንዝ ፖለቲካ ይዞህ ከሚሄድ…
–    የገንዘብ ወንዝ ይዞኝ ይሂድ!
[ክቡር ሚኒስትሩ ቢሮ አንድ ከውጭ የመጣ ባለሀብት ገባ]
–    ምን ልርዳህ?
–    አዲስ ሐሳብ ይዤ መጥቼ ነው ክቡር ሚኒስትር፡፡
–    የምን አዲስ ሐሳብ?
–    በዘመናዊ መንገድ ቤቶች የመሥራት ሐሳብ ይዤ መጥቻለሁ፡፡
–    በጣም ደስ ይላል፡፡
–    አዎን ክቡር ሚኒስትር፣ ለእርስዎም በዛው ሐሳቡን ልንገርዎት ብዬ ነው፡፡
–    ምንድን ነው ሐሳቡ?
–    በአዲሱ ቴክኖሎጂ በርካታ ቤቶችን በቀላሉ በአንዴ መገንባት ይቻላል፡፡
–    ይህማ ስንፈልገው የነበረ ነገር ነው፡፡
–    የበርካታ ዜጐችን የቤት ጥያቄ መመለስ እንችላለን፡፡
–    ኧረ ለመሥሪያ ቤታችን ሠራተኞች ራሱ ቤቶች ትሠራልኛለህ፡፡
–    በደስታ ክቡር ሚኒስትር፡፡
[የክቡር ሚኒስትሩ ወዳጅ ባለሀብት ደወለ]
–    አቤት ወዳጄ፡፡
–    ሰሙ እንዴ ክቡር ሚኒስትር?
–    ምኑን?
–    አንድ የውጭ ባለሀብት አገር ውስጥ ገብቷል አሉ፡፡
–    የምን ባለሀብት?
–    ቤቶችን በአዲስ ቴክኖሎጂ እሠራለሁ ነው የሚለው፡፡
–    እሱንማ አግኝቼው ነበር፡፡
–    ክቡር ሚኒስትር ሥራችንን እኮ ዜሮ ነው የሚያስገባው፡፡
–    እ…
–    እንደዛ ከሆነ ደግሞ የእርስዎም ጥቅም ተቋረጠ ማለት ነው፡፡
–    ምን ላድርግ ታዲያ?
–    ከቻሉ በአስቸኳይ ያስቁሙት፡፡
–    ተወው በቃ፡፡
[ክቡር ሚኒስትሩ የውጭ ባለሀብቱ ጋ ደወሉ]
–    አቤት ክቡር ሚኒስትር?
–    ያመጣኸው ቴክኖሎጂ ብዙም ለአገራችን የሚሠራ አይመስለኝም፡፡
–    ለምን ክቡር ሚኒስትር?
–    ከባህላችን ጋር አይሄድም፡፡
–    የአገሪቱ ባህል ምንድን ነው?
–    የጭቃ ቤት፡፡
–    እ…
–    እና ፕሮጀክትህ መቋረጥ አለበት፡፡
–    በዚህ ምክንያት?
–    አዎ፡፡
[ክቡር ሚኒስትሩ የሚፈሩዋቸው ሌላ ሚኒስትር ደወሉ]
–    ክቡር ሚኒስትር ምን እያደረጉ ነው?
–    ምን አደረኩህ?
–    ከውጭ የመጣውን ባለሀብት ምንድን ነው ያሉት?
–    ፕሮጀክቱን እንዲያቆመው ነግሬዋለሁ፡፡
–    እኮ ለምን ሲባል?
–    ከባህላችን ጋር አይሄድማ፡፡
–    የምን ባህል?
–    ባህላችን እኮ ጭቃ ቤት ነው፡፡
–    አሁንም አላቆሙም ማለት ነው፡፡
–    ምን?
–    ማቡካት ነዋ፡፡
–    ምንድን ነው የማቦካው?
–    ጭቃ!